15-8-21 童貞女馬利亞日

李健生弟兄

今日係聖公會嘅年曆裡，是耶穌的母親馬利亞的節慶日。

我哋啱啱聽到喺福音經課中，記載馬利亞對神嘅讚歌。馬利亞讚歌嘅又名爲“尊主頌”，係每一日喺聖公會晚禱崇拜中都會讀出或唱出，係崇拜不可或缺嘅一部分。今日我會同大家睇下尊主頌裏面深厚嘅神學同政治意義，從而帶出馬利亞作爲基督母親，對我地基督徒今日有乜啓發。


馬利亞嘅尊主頌一開頭就話：我心尊主為大；我靈以神我的救主為樂。呢道佢響應咗係舊約聖經裏面，撒母耳嘅母親哈拿對神嘅讚歌。哈拿長年不育，經多年禱告後終於得到撒母耳，佢係奉獻撒母耳俾神時，有感而發，係聖殿裏讚美神，佢話：我的心因耶和華快樂；我的角因耶和華高舉。我的口向仇敵張開；我因耶和華的救恩歡欣。


兩位同爲母親，但馬利亞對神開口讚美嘅時侯，佢同哈拿嘅處境係好唔同嘅。哈拿讚美神嘅時侯，佢已經生咗撒母耳；但馬利亞讚美神嘅時侯，佢係未婚懷孕，係世人眼中係犯通姦，佢所受嘅壓力，所受世人嘅眼光，並唔係我地可以想像得到嘅。喺咁嘅情況下佢仍然可以話“我心尊主為大；我靈以神我的救主為樂”，我地可以睇到佢由信賴神而得到嘅平安。


其實，喺新約聖經裏面記載嘅馬利亞，係一個一生裏面都完全信靠神嘅人。當天使佈信話畀佢聽，神揀選咗佢作爲基督嘅母親嘅時候，佢對天使話：我是主的使女，情願照你的話成就在我身上。憑信，佢接受咗神對佢嘅呼召，佢對神嘅順服，解開咗亞當同夏娃喺創世之時因私慾而綁下罪惡嘅死結。今日，當我地清楚感受到神呼召我地做喺人眼中看似不可行，甚至愚蠢嘅事嘅時侯，我地有冇馬利亞嘅信心，順服緊隨，同樣對神話：情願照你的話成就在我身上？


馬利亞繼續話：“他憐憫敬畏他的人，直到世世代代。他用膀臂施展大能；那狂傲的人正心裡妄想就被他趕散了。”作爲一段出自一個未婚懷孕嘅女人嘅禱告，呢段經文我地可以理解爲馬利亞對未來嘅憧憬，對佢懷着嘅耶穌嘅祈望；係佢對神公義嘅盼望。哩個希望係有根據嘅，因爲尊主頌嘅內容，響應咗以賽亞先知嘅預言，以賽亞話：耶和華嘅受膏者會醫好傷心的人，報告被擄的得釋放、被囚的出監牢，安慰一切悲哀的人。更重要嘅喺，尊主頌亦預示咗耶穌基督佢自己嘅教導：那在後的將要在前，在前的將要在後。所以，馬利亞早早就認清楚耶穌基督來到世間嘅使命。


德國神學家潘霍華話尊主頌作爲最古老嘅將臨期聖詩，尊主頌亦係最激動，最革命性嘅將臨期聖詩。唱呢首聖詩嘅馬利亞，並唔喺我地想像中溫柔，被動，甚至一個好似發緊個好夢嘅少女孩，而係一個硬淨，堅強，充滿同情心嘅母親。作爲一首將臨期聖詩，佢講嘅並唔喺耶穌誕生帶來嘅平安，快樂；而喺清楚咁話俾世人聽，基督嘅來臨，進入人世，係要顛覆人嘅定律，顛覆人嘅期望；佢嚟喺要爲無助嘅人發聲，爲無權嘅人爭取公義。


呢段經文我地再睇清楚啲，內容其實真係好顛覆性的嘅，好充滿政治色彩嘅。“他叫有權柄的失位，叫卑賤的升高；叫飢餓的得飽美食，叫富足的空手回去。” 馬利亞兩句禱文就得罪曬古今中外所有達官貴人。


喺1805年，英國傳教士Henry Martyn去到英屬印度時發現，英國殖民地政府因爲尊主頌令人聯想起殖民統治欺壓當地人民，竟然頒令禁止聖公會喺晚禱崇拜中使用尊主頌。


喺1977年嘅阿根廷，因爲數以千計反對獨裁政府嘅學生，知識分子,同埋工人“被消失”，一個名爲“五月廣場母親”嘅組織，爲咗抗議，每星期四係阿根廷總統府前的五月廣場誦讀尊主頌。阿根廷政府最後頒令禁止任何人誦讀尊主頌。


英國殖民地政府早已撤離印度，阿根廷獨裁政府不過六年就倒臺。今日，我地仍然誦讀緊馬利亞二千年前唱出嘅尊主頌。


雖然對於新教徒，馬利亞在聖經中，以至在基督教信仰中的地位經常引起紛爭辯論，但係今日，我地睇到佢對一篇咁有力量，咁顛覆嘅禱文，由一個十幾歲嘅猶太女孩讀出，足以證明馬利亞並唔單單係一個貧窮嘅小女孩，佢唔止係新約聖經裏其中一個小人物。佢以單純嘅信心，對神指意嘅順服，以一句“我是主的使女，情願照你的話成就在我身上”，讓基督道成肉身，讓神性參與人性。馬利亞嘅順服，同我地領受基督嘅救恩有不可分割嘅關係。


當然，我地一定唔可以忘記馬利亞唱尊主頌嘅時候，有基督嘅肉體喺佢嘅身體內，有聖靈充滿喺佢嘅心內。今日，我地喺聖餐裏領受基督嘅身體，實實在在咁以行動邀請基督嘅進入我地嘅生命裏面。當我地與基督同埋各肢體在聖餐裏共融時，我地就得着神嘅恩典去忠誠地回應佢對我地每一個因不同嘅呼召。


當我地領受基督，讓聖靈帶領我地走前面嘅路，縱使在人看似艱難，在人看似不可能，我地仍然能夠秉行公義，好憐憫。咁樣，馬利亞嘅尊主頌，好自然就係我地每一個人嘅尊主頌。當我地能學效馬利亞，喺每樣事情上都完全信靠神，咁我地都可以同佢一樣，係逆境中唱出：我心尊主為大；我靈以神我的救主為樂。